جوزي اتصل بيا وقاللي عازم مامته وباباه واخواته وعيالهم وجوازهم ومراتاتهم وجيارناهم وصحابهم اول يوم رمضان
بجد مواضيعكو كلها تفطس من الضحك كلها عن رمضان وحوسه رمضان في العزومات
وكأن عزومه رمضان دي وحش مخيييييييييييييف
بعبع كلنا بنترعب منه
ولا جوزك وهو هالل عليكي كده وعلي وشه الابتسامه البايخه دي عارفينها طبعا ]هو جاي يبلغك الخبر المشؤوم
ولا كانه عمل حاجه علي وشه برائه الاطفال
انهارده هانناقش الصعوبات اللي بتواجهنا كلنا في عزومات رمضان ونحاول نتغلب عليها ان شاء الله
وهانحاول نروض الوحش المخيف ده
ونحوله الي ملاك لطيف ورقيق
يلا ورايا يا ولاد بس متردوش لحد ماخلص
اولا تجهيزات ما قبل رمضان
اكيد كل بيت دلوقتي فيه ديب فريزر ده بقي لازم نستغله اسوا استغلال
1- حفظ التوم والبصل
قشري التوم والبصل بكميات كبيره وافرميهم عادي في الكبه ولكن اياكي تحطيه كده زي ماهو لازم يتغطي تماما بالزيت علشان لونه مايسودش وطعمه مايتغيرش
بعا ممكن نجيب اتوم في اول الموسم بيكون طري خالص
يادوب نشيل القشره ونفرمه في الكبه وبرضه نغطيه تماما بالزيت
هاتعرفي ازاي تتخلصي من ريحه التوم من ايديكي الشيف اسامه السيد في احدي حلقاته قال علي معلومه كده عالماشي طبعا انا نفزتها علي طول ومن ساعتها مابطلتهاش لتتخلصي من ريحه التوم من ايديكي امسكي معلقه استانلس او اي حاجه تانيه استانلس وافتحي الحنفيه وادعكي ايدك في الستانلس تحت الماء الجاري وبدون صابون بجد بتضيع ريحه التوم في ثواني - احلي طريقه لاحلي صلصه الطريقه دي جميله جدا جدا في حفظ الطماطم مش بس كدهكمان اسهل من السهوله حطيها زي ما هي سليمه في درج من ادراج الفريزر وعند الاستعمال طلعي الكميه المطلوبه وسيبيها تفك خااااااااااااالص هاتلاقي القشره انفصلت لوحدها شيلي القشر كله وحطيها في طبق بعد ثواني معدوده هاتلاقيها نزلت ميه صفرا الميه دي بقي فيها كل المراره والحموضه اللي بتبقي في الطماطم]نرمي الميه طبعا ونضرب الطماطم في الخلاط[ ونحطها دقايق قليله تتسبك مش بتاخد وقت خااااااااااااااااااااااالص
اولا : لانها شبه مستويه في الفريزر
ثانيا : لان الميه اللي نزلت دي وفرت الوقت اللي بتقعده علي النار علشان تتركز وكمان مش فيها اي حموضه وبتبقي مسكره وجميله جدا جدا جدا
]بجد احلي طريقه جربتها للطماطم ده غير انها سهله جدا ولا تضربي وبعدين تصفي وبعدين تسبكي ووجع القلب ده
ولكن لو مزنوقه ومافيش طماطم واضطريتي تستخدمي الصلصه الجاهزه اوكي بس المشكله ان الصلصه البواكي طعمها مر جدا ولاذع جدا الحل نحطلها لبن بجد طعمها تحففففففففففففه ومش هاتفرقيها عن الفريش نايجيلا لاوسون اكتر من مره اشوفها بتعمل كده في صلصه المكرونه وكنت ممستغرباها قوي وقرفانه منها زيك كده بالظبط لحد ما جربتها في مره وقلت رزقي علي الله لقيتها في منتهي الجمال وجوزي ماعرفهاش خاااااااااااااااااالص كان لونها احمر فاتح مش غامق وطعمها مسكر وجميل لاني كمان باحطلها سكر
ثانيا تجهيزات ما قبل العزومه بيوم
1-شراء كل شئ متعلق بالعزومه ممكن نحتاجه 2- الاكياس البلاستك
بعد عناء شديد مع الحلل والمواعين اللي احط فيها الحاجه من بالليل لتاني يوم في التلاجه وكركبه والحاجه تبقي فوق بعضها وساعات مش بالاقي مكان اصلا بتبقي اتملت عالاخر وابقي مش عارفه اودي الحاجه فين توصلت للحل ده الاكياس البلاستك بتاعه السندوتشات اه كلنا بنشيل فيها الاكل في الفريزر بس انا بقي باحط فيها كل شئ تتخيلوه حتي الشوربه والسلطات باعملها من بالليل واشيلهم كلهم في الاكياس دي وكل حاجه متتبله احطها في اكياس والنتيجه بقي قبل العزومه بيوم كله هايتجهز ويخش التلاجه او الفريزر
والمواعين تتغسل وتتشال والمطبخ يتنضف
ده غير ان مافيش روايح هاتكرف علي بعض علشان لو عامله اي صنف حلو من بالليل لو حطيتي جنبه الفراخ واللحمه المتتبله والسلطات وكده الريحه هاتكرف وهاتبقي وحشه قوي
يوم العزومه مافيش مواعين فجاه تتكربس فوق دماغك تفتحي الاكياس علي الفرن او البوتاجاز او اطباق التقديم عدل وترمي الكيس بدون اي عناء بجد فكره حلوه اتمني كلكو تجربوها
- التحضير المسبق للمكونات
يعني قبل العزومه بيوم لازم كل السلطات تكون جاهزه خالص ومحطوطه في اكياس في التلاجه زي ماتفقنا
لان السلطات كل مابتقعد بتحلو
اللي هايحتاج تتبيل يتتبل ويتشال برضه في اكياس في التلاجه
لو هانعمل اي صينيه فيها بشامل يتعمل قلبها بيوم او اتنين او حتي تلاته ويتشال في الفريزر وساعه الاستعمال يتفك علي النار لحد مايسخن ويستعمل علي طول
اللحمه المفرومه تتعصج وتتشال في الفريزر بس مش كتير لان طعمها بيغير وان كنت انا مش بافضل الموضوع ده
]ممكن قبلها بيوم تتعصج وتتشال في التلاجه مش الفريزر
اي معجنات او سمبوسك تتعمل عالقلي وتتشال في التلاجه برضه علشان هي محشيه لحمه مفرومه وزي ماتفقنا طعمها بيغير
الخضار يتنضف ويتغسل ويتقطع ويتجهز ولو هاتستعملي البطاطس يبقي تتقطع وتتنقع في ميه وتتساب في المطبخ عادي
اي حاجه بسيطه ممكن تتعمل اعمليها واخلصي منها
لو الرز محتاج تنقيه يتنقي ويتشال
وان كنت مش مع انك تستعملي نوع رز ردئ اصلا انا باحب اجيب الرز المغسول كمان يادوب بافتح الكيس علي الحله
يعني اي شئ يوفر وقت ومجهود ماتتردديش فيه
منصحش بتجربه اي صنف جديد الا في حدود ضيقه
يعني الوصفه تكوني متاكده منها من حد موثوق زيي كده ههههههههههه وتكوني حاسسه انك هاتقدري تعمليها او عندك خلفيه عنها من الاول
بلاش نجرب في الناس كله سلف ودين
العصاير والمشروبات
تعملي العناب اللي هو تمر هندي علي كركديه طعمه احلي بكتير من الكركديه لوحده او التمر لوحده
وطبعا لازم ياخد غلوه علي النار وبعدين يتركن في المطبخ عادي
تعملي خروب ودوم
هاقوللكو علي طريقه رهيييييييييييييييييييييييبه لعمل الدوم والخروب تشوحي شويه سكر علي النار لحد مايتكرمل وتضيفي الخروب او الدوم وتقلبي كويس لحد مايحمر قوي صبي فوقه ميه كافيه لغمره سيبيه يبرد علي جنب ويتركن برضه في المطبخ لحد الصبح
نعمل الخشاف
]قراصيا علي مشمشيه علي بلح علي قمر الدين علي تين كله يتقطع ويتنضف ويتنقع في ميه عاديه من الحنفيه وفي ناس بتحب تحطله لبن ويتركن في المطبخ لحد الصبح
]تجهيز الشربات للحلويات واي صنف حلويات بارد زي المهلبيه وقمر الدين والجيلي يتعمل قبلها بيوم ويتصب في الاطباق ويتزين ويتشال في التلاجه
هاقوللكو علي احلي وصفه للشربات بجد رهيييييييييييييييييييييييييييييييييب
كيلو سكر علي كوبايتين ميه لو عاوزينه خفيف او كوبايه واحده لو عاوزينه تقيل وعليهم ربع كيلو عسل جلوكوز بيخلي الشربات يلمع ويقعد كتيييييييييييييير ممكن نعمله من قبل رمضان حتي ونحط عليهم اما لمونه او ربع ملعقه ملح لمون
3- تزيين الاكل
ماينفعش نغفل عنه خالص او نهمل فيه لان هو ده العنواان بتاع اي عزومه ولو العنوان جذاب ومغري الناس ممكن تنسي الاكل اصلا لو فيه اي غلطه
عامه انا باعمل اشكال كتير من اشكال الزينه قبل العزومه بيوم وتتنقع في الميه وتتشال في كيس بلاستك وفي التلاجه
4-طبعا التوم والبصل والطماطم متخزنين في الفريزر
خلاص كده تقريبا مش فاضل غير حاجات بسيطه يوم العزومه
اليوم الموعود (البعبع )
الصبح هاتطلعي اللحوم المتبله والاصناف اللي هاتحتاج شوي او الصواني او الطواجن
وتقفلي كله وتدخليه الفرن او عالبوتاجاز واللي هايحتاج قلي يتقلي ويبقي يتسخن في الفرن قبل الاكل بنص ساعه
[size=25]ماعدا الرز سيبيه شويه
ساعه بالكتير هاتكوني مخلصه لان كل حاجه شبه جاهزه
دلوقتي التلاجه فضيت الي حد ما هاتعملي ايه
تاخدي العصاير اللي مجهزينها وناقعينها من بالليل تحطيها في التلاجه علشان تسقع وياريت تكوني عامله مكعبات تلج تحطي في كل شفشق
كام قطعه تلج علشان يسقعوا بسرعه وتسيبيهم في التلاجه
تلفي لفه علي الشقه تظبطيها عاده باسيب المهمه دي علي جوزي
الاكل خلص وطلع من الفرن سيبيه علي جنب يهدي
ابداي اعملي الحلويات اللي هاتحتاج فرن زي الكنافه او الجلاش
خلصيها واركنيها برضه في المطبخ مش التلاجه
دلوقتي بقي فاضل علي المغرب ساعه ونص
اعملي الرز
لانه يفضل انه يبقي سخن ويتقدم علي طول
خلاص فاضل ساعه علي المغرب
الاكل كله خلصان والعصايروالحلو في التلاجه
جوزك بقي عليه العيش والمخللات
رصي السفره
هاقوللك علي طريقتي في رص السفره
بتوفر مكان ووقت ومجهود
طريقه الاوبن بوفيه كل الاكل يتحط في سرافيس و الاطباق بعدد المعزومين داير مايدور السفره جنب كل طبق منديل سفره شيك ملفوف فيه شوكه ومعلقه وسكينه توفيرا برضه للمكان واسهل من الرص حوالين الاطباق كل طبق جنبه كاس وكوبايه الكاس للعصير والكوبايه للميه وطبعا شفشفق الميه مع طقم الكوبايات لو في شوربه يبقي مج الشوربه يتحط فوق الطبق الفاضي لان المفروض ان الواحد بيشرب الشوربه الاول ويخلصها ويركن المج علي جنب ويبدا يختار من البوفيه اللي هو عاوزه
قبل الاذان بنص ساعه
المعازيم وصلوا
رحبي بيهم بلاش التكشيره دي
اه انتي تعبانه مفهوم بس هم مالهومش ذنب هههههههههههههههههه ورينا صفين اللولي
هنا بقي الكل بيساعدك حتي المعازيم نفسهم
السلطات طلعيها من التلاجه وحطيها في اطباق كبيره او سرافيس برضه المهم ان كل نوع يتحط في طبق واحد بس
كل الاكل في سرافيس زي متفقنا طلعي اشكال التزيين من الميه اللي منقوعه فيها وزيني كل سرفيس قبل مايطلع من المطبخ خلاص كده رصيتي الاكل والسلطات والمخللات صبي الميه والعصير لكل فرد قطعي العيش اربع ارباع وحطيه في سله العيش ويتحط في اخر السفره لان غالبا محدش بيحتاجه
السفره جاهزه ماشاء الله تبارك الله
بجد شكلها يفرح والتزيين والعصاير الاكل كله يشرف بجد
متخيلينها معايا هههههههههههههههه صبي اطباق الخشاف وجوزك يخرج يقدم للضيوف الخشاف في الصالون مش علي السفره
اولا علشان المكان
ثانيا علشان كل واحد هاياكل طبق الخشاف ويقوم يصلي المغرب
نرجع للسفره نقعد كلنا حوالين السفره
انتي طبعا لازم الكرسي بتاعك يكون جنب الباب او اقرب للمطبخ علشان تعرفي تتحركي بسهوله لو احتجتي حاجه
خلاص كلنا وهيصنا وشربنا العصاير وحلينا
تسلم ايديكي يا ست الكل
الاكل كله جميل والسفره جميله ورمضان كريم وعقبال كل سنه
نسيبك بقي علشان المواعين والذي منه هههههههههههههههههههههههه
وكل عزومه وانتي طيبه ويجعله عامر
[/center] [/center]
موحه المشرف العام
تاريخ التسجيل : 10/06/2011 عدد المشاركات : 2589 العمر : 43
الرئيسية 
المنشورات 
28/2/2024, 4:12 pm
تاريخ التسجيل
عدد المشاركات
العمر
موضوع: عزومه رمضان وحش مخيييييييييييييييف >>><<<ام ملاك لطيييييييف 
25/7/2011, 5:58 pm
كلها عن رمضان وحوسه رمضان في العزومات
تسلمى ياقمر وكل عام وانتى بخير 
بجد موضوووووووووووع فوق الروعة
