سفرة البطاطس...

سفرة البطاطس...














دي فكره بسيطه بس سهله جدا ويارب تعجبكم..
هي عباره عن مجموعة مقبلات من البطاطس بس ممكن تعمل وجبه كامله
احنا بنحط كام بطاطسيه في حلة مايه ونسيبهم يتسلقوا كويس وبعدين نبدأ الابتكارات

أول حاجه:/ البطاطس بالبيض


بطاطس مسلوقه ومهروسه كويس وبعدين نحط عليها بيضه واحده ونقلبها كويس مع
الملح والفلفل وناخد منها بالمعلقه ونحمرها في الزيت، ونطلعها على ورق
المناديل

أو ممكن نهرس البطاطس، وبعدين نعمل بيض بالسمنه عادي ونحطهم على بعض وبس كده

تاني طبق:/ البطاطس بالقوطه

نهرس البطاطس ونقطع عليها قوطاييه مش كبيره قوي وبعدين فصين ثوم وملح بكمون
ومعلقتين زيت (يفضل ان الزيت يكون سخن -يعني ممكن من الزيت اللي بتحمري
فيه- بينزل على الثوم ويعمل طشششش ويديها طعم أحلى)

تالت طبق:/ البطاطس المحمره

ببساطه بعد ماتسلقي البطاطس ممكن تقطعيها بأي شكل يعجبك وتحمريها، بتكون مقرمشه ولطيفه قوي

رابع طبق:/ كفتة البطاطس

البطاطس المسلوقه كويس بنحط عليها معلقتين تلاته لحمه مفرومه معصجه وشوية
بقدونس (وبقسماط لو احتاجت) وبعدين نحطها في البيض والبقسماط ونسيبها في
التلاجه شوية وبعدين نحمرها
(اللي في الصوره شكلها مش عاطفي عشان كنت حاطها في الفريزر وطلعتها عملتها فبقت مبعككه شويه ههههه)

وآخر حاجه:/ سلطة البطاطس البسيطه

بس البطاطس هنا مش مسلوقه، هي مقطعه مربعات صغيره ومحمره ، وبعدين نجيب
فصين ثوم وشوية شبت أخضر أو أي خضرة بتحبيها ونفرمهم ناعم بالسكينة ونقلبهم
على البطاطس

وممكن نعمل معاهم شوية شكشوكه بتبقى هايله


يارب يكون الموضوع عجبكم، , جزاكم الله خيرا

تسلم ايدايكى يا قمر

روووووووووووووووووووووووعه
سلمت يمينك

سلمت الايادي الطيبة اختي الكريمة