افكار رمضانية تجمعى بها حسنات كتير

أفكار رمضانية
******************
1_أبعت رسائل sms للناس وفكرهم بالنية فى اعمالهم وتاخد ثوابهم ان شاء الله
2_هات علبة بلح(5 أو 6 جنية) وانزل قبل المغرب بعشر دقايق ووزع على الناس التمر والبلح فى المسجد او الشارع وتاخد ثواب صائم وكانك صمت رمضان اكثر من مره..ومن لم يستطع فعليه ان يعطى العلبه للمسجد فهى تفعل ذلك يوميا
3_تعاون مع والديك فى شراء الطعام بنية بر الوالدين وتعاونى معهم فى تنظيف الاطباق وتحضير الطعام
4_اشغل وقتك فى مشروع خيرى(اطعام الطعام..دعوة الى الله..مساعدة فقراء ومحتاجين..الخ) وخد ثواب كبير
5_انزل اشترى حلويات واكل للاطفال الفقراء او بلالين..بنية ادخال السرور عليهم فهى من احب الاعمال الى الله كما جاء فى الحديث الشريف
6_جمّع اهلك وجيرانك واعمل افطار لفقراء الشارع عندك (مائدة رحمن صغيره) ولو مره فى الشهر
7_جمعى صحباتك واقعدوا فى بيت واحده منكم واذكروا الله او اعملوا حلقة ذكر وعلم وقراءة قران او تفطروا مع بعض او كل واحده تعزمكم عندها وبكده تاخد كل واحده منكم ثواب تفطير صائم
8_اعمل مجلة او لوحة عن رمضان فيها معلومات واحكام وفضل رمضان وعلقها فى البيت او فى المسجد او فى العمل
9_اتفق مع اصحابك فى الشهر ده على جزء معين من القران او سورة من القران تحفظوها وفى نهاية الشهر تعملوا مسابقة فى السورة دى واللى يفوز ياخد جايزة وبكده تبقوا اخدتوا ثواب وجوايز وكمان حفظتوا حاجه جديده من القران..وممكن تقروا طول الشهر تفسيرها من كتاب تفسير صغير عشان تفهموا وانتو بتحفظوا
10_والدتك_جدك_عمتك_خالتك..نسيتوهم؟؟ يلا هات الموبيل واطلب وابعت sms وصل رحمك..وخلى ولو كل اسبوع زياره(رمضان 4 اسابيع) لكل واحد منهم..لتاخد ثواب صلة الارحام
11_جربى تحطى فى مطبخك راديوا او شغلى راديوا موبيلك على اذاعة القران الكريم وتبقى بتشتغلى وانتى بتسمعى القران الكريم..او علقى آيه قرانية او حديث جميل على باب البيت عشان اللى يدخل يقراه وتخدى ثواب
12_جمع ابنائك وبناتك وابناء اقاربك واعمل لهم خروجة بسيطة وفسحه حلوة بنية ادخال السرور عليهم واعمل لهم مسابقة حلوه وفى الاخر اديهم جايزة او خدهم وافطر معاهم بره فى اى مطعم جميل عشان تجع شملهم مع بعض
13_ممكن نقرا تفسير سورة كلنا حفظنها وبنحبها(الكهف مثلا او يس او مريم او الرحمن) وتصلى بيها مع اخوك او اختك او والديك او حتى اصحابك لنتعلم تدبر القران وكمان نبقى حفظنا سورة جديده بتفسيرها البسيط
14_ممكن نقرا شوية عن سيرة حبيبنا صلى الله عليه وسلم ولو غزوة بدر واللى كانت فى شهر رمضان ونتعلمها ونعلمها لابنائنا واصحابنا
15_ايه رايك تجيب شريط قران او درس دينى جميل وتديه لاصحابك كل واحد منهم يخده يوم (30 صاحب فى الشهر) او تديه لسواق تاكسى او ميكروباص يشغله فى عربيته للركاب او تحطه فى المسجد لاى حد يسمعه وتبقى داعبة الى الله بذلك الشريط؟
16_ايه رايك تزور دار ايتام او دار مسنين وتدخل السرور عليهم وتعمل بحديث النبى صلى الله عليه وسلم:" الساعى على الارمله والمسكين كالمجاهد فى سبيل الله او الصائم الذى لا يفطر والقائم الذى لا يفتر"
17_ايه رايك تزرع شجرة ادام بيتك او زهور جميله او تنظف الشارع انت واصحابك وتزينوا الشارع بمناسبة رمضان..وتبقى طبقت حديث النبى" ان الله جميل يحب الجمال...نظيف يحب النظافة..فنظفوا أفنيتكم"؟؟
18_ايه رايك تبعت على الكمبيوتر لاصحابك على ايميلك او الفيس بوك كل يوم حديث جميل او آيه جميلة او دعاء حلو او معلومة عن رمضان او حكم فقهى رائع..وتبقى دليت على الخير بعلم ينتفع به وصدقه جارية ليك
19_ايه رايك تحضر درس كويس وتتكلم فى المسجد او تقوله لاصحابك او حتى تكتبه وتوزعه بين اصحابك او لو مش بتعرف تتكلم على الاقل توزع كتيبات صغيره او قصائص ووريقات مكتوب فيها نصائح دينية جميله مع البلح اللى هتوزعه؟؟
20_ايه رايك تاخد الثواب مرتين..يعنى ايه؟ تروح تصلى التراويح فتاخد واحد معاك..تفطر صايم..وانت رايح تفطر صايم تاخد واحد معاك..وانت رايح تصلى تاخد واحد واحد معاك..وانت رايح الاطعام او مشروع خيرى تجيب واحد معاك..وهكذا وتاخد الثواب مرتين؟؟