كرات اللحم السويدية

[center]
الأكة دى عبارة عن كرات لحم في صوص بنى مع مشروم وجنبها رز أبيض علشان الطبق يبقي كامل هنعمل جنبها سلطة فاصوليا

أولا طريقة عمل الأرز الأبيض
2كوب رز بسمتى تغسيليه وتنقعيه مع نص ليمونة
3كوب ماء
معلقتين زيت
4فصوص هيل (حبهان)
عودين قرفة
4حبيات فلفل أسود حصى

نحط الماية على النار ونحط الزيت والحبهان والفلفل والملح والقرفة العيدان (كل الحاجات مش مطحونة علشان متأثرش على لون الرز)لحد ما المية تغلى كويس ونصفي الرز ونحطه
وحقولكم على سر متغطيش الحلة ولا تهدى النار قبل مامية الرز تقرب تنشف اول ما المية تقرب تنشف غطى الحلة وهدى النار خالص
وسبيه لحد مايستوى
وعلشان الرز يبقي ناصع البياض قبل ماتطفى عليه حطيله أقل من 4\1 كوب بن حليب وسبيه يبخر واطفئ عليه

نيجى لكرات اللحم
المقادير
2\1 كيلو لحم أحمر مفروم خالى من الدهون
بصلة متوسطة
معلقتين بقسماط
بهاراتك اللى تحبيها


الصوص البنى
معلقتين دقيق
معلقتين زيت
4\1 كوب صويا صوص (أنا بحب أستخدم الصويا المعتدلة مش الحلوة بس انتى واختيارك)
4\1 مشروم متقطع شرايح (وممكن تستخدمى العلب )
كوبيتين ماء

كرات اللحم
نخلط اللحمة على البصلة المفرومة على البهارات على البقسماط
ونعملهم على شكل كرات ضغيرة
الى اكتمال الكمية

طريقة عمل الصوص
هنعمل الصوص في صينية علشان تأخد كرات اللحمة بعد كدا

نضع الزيت على النار نضع الدقيق لقرب مايتحمص ونضع علية المشروم ونشوحه شوية
وبعدين الصويا صوص

وبعدين نضع المية
لو بقي في حبيبات في الصوص متقلقيش لأن احنا عاوزين الصوص محبب مش كريمى
ونحط ملح وفلفل
ونسيبه لما يغلى كويس
ونبتدى ننزل كرات اللحم واحدة واحدة جوة الصوص

تأخد غلوتين على النار وبعدين نحطها في الفرن لاكتمال السوي وكمان الكرات تحمر
ملحوظة قلبيها من وقت للتانى
ونخلى بالنا منها علشان بتنشف
ومبيفضلش فيها غير صوص بسيط

نرفعها من على النار

ونغرفها هى والرز في طبق واحد جنب بعض
ونضع فوقها شوية صوص


نيجى بقي لسلطة الفاصوليا


هنضف الفاصوليا ونسيبها بطولها مش هنقطعها
نحط معلقة زيت في طاسة وعليها فص ثوم مدقوق ناعم وقبل مايصفر ننزل بالفاصوليا ونشوحها في الثوم لحد ماتخد لون ونحط رشة ملح بسيطة

وبعدين نحط شوية مية صغيرين قوى ونغطى عليها لحد ما تبخر ونطفى عليها ونسبها هى بتدبل لوحدها

وبتقدم جنب الطبق باردة


متنسوش تدعولى


وبالهنا والشفا

ربنا يبارك لك يا ام ياسين يارب تسلم ايديكى يا قمر

الله يسلموا الايادى شكرا على مجهودك حبيبتى

تسلم ايدم ياام ياسين مشكووووووووووووووووووورة ومنتظرين المزيد من ابداعاتك