سامحنى يا ...والدى الغالى

موضوع: سامحنى يا ...والدى الغالى 10/4/2012, 3:18 pm

انا اول مرة اتكلم مع حد فى الموضوع دة والحقيقة مش عارفة ابدا من فين

انا عشت مع والدى حياة قاسية كان بيسودها التعسف والتسلط يعنى مثلا احنا كناعايشين فى بيت كبير كذا طابق واحنا اسرة صغيرة عبارة عن 3 بنات ووالدى ووالدتى
والدى كان بيتحكم فى نوعية الاكل اللى بناكلة ولو طلبنا حاجة كان بيعمل عكس اللى احنا عايزينه حتى كان بيخلينا ننظف البيت كله حتى الطوابق المغلقة اللى ماكناش بنعيش فيها كان بيقول الكلمة لازم يتنفذ
وما فيش حاجة اسمها اعذار ,افتكرت دلوقتى واحنا بنبنى البيت
خلانا نشيل انا واختى الكبيرة وامى الطوب نطلعة الدور الرابع على ما اذكر وكنا بنفضل طالعين نازلين لحد ما ننهد
نطلع اكل وشاى للعمال وانا كنت ساعتها فى تانية ثانوى انا فاكرة كمان لما دخلت الكلية وكنت لغات
طلبت اخد كرس طبعا مش رضى وفاكرة اختى وهى فى الثانوى كانت بتذل عشان يجيب ليها كتاب
ولما اتقدملى عريس رفضة كتير وفى الاخر وافق بالعافية كان مش بيرضى يخليه يجى عندنا الا كل شهرين ومش رضى يجوزنا الا بعد 4 سنين بابا فعلا تعبنى اوى اقل جهاز جابهولى اصعب وقت عيشتة معاة ولكن فين بابا دلوقتى

بابا مات ايوه مات من 5 سنين مات مات
خلاص مش هشوفوه تانى خلاص مش هيهزانى تانى خلاص مش هيحرجنى قدام جوزى واهلة
لكن للاسف مش لحقت اقوله انى بحبه مش لحقت احضنة واقولة سامحنى
سامحنى على كل يوم رديت عليك وعليت صوتى طبعا انت السبب لكن برده سامحنى لان ربنا قال:
(ولا تقل لهما اف ولا تنهرهما)
سامحنى لانى مش جيت قولتلك انا بحبك اوى يا بابا صحيح انت مش كنت بتقول كدة بس ده يمكن لانك اتربيت كدة
سامحنى لان كان نفسى تخرج ومش ترجع تانى وانا مش كنت عارفة معنى كلمة يتيم ايه
سامحنى لانى مش حبيتك كفاية سامحنى لانى مش وطيت وبست ايدك وبست رجلك
سامحنى انى لما كنت بروح بيتك بعد ما اتجوزت مش بهتم انى اقعد معاك
كنت بفرح لما تنام
عارفين دلوقتى بس افتكرت لما كنت صغيرة وكان بياخدنى انا واختى يوم الجمعة كان بيقعد بحكيلنا قصص
الانبياء وهو واخدنا فى حضنه ,كان بيلعب معانا وبيدلعنا
افتكرت لما كنت فى الثانوى كان نفسة اكون دكتورة وكان بيقولى لو بقيتى دكتورة هجيبلك عربية وافتحلك عيادة
واقعد على الباب ولو دخلتى صيدلة هجيبلك صيدلية واشتغل عندك
ولما دخلت كلية تانية كان عندة امل ابقى معيدة عشان كدة رفض جوزى ساعتها اكيد مش كان عايز حاجة تعطلنى عن الدراسة
افتكرت كمان لما ولدت بنتى التانية كان عندى حمى كان بيدخل الاوضة الصبح قبل ما يروح على الشغل يحط ايدة على دماغى يشوفنى سخنة ولا خلاص السخنية راحت كنت بعمل نفسى نايمة شفتوا اد ايه انا وحشة صعب عليه اقولة صباح الخير يا بابا
صعب عليه احسسه بحبى لية
عرفت دلوقتى انه حرم نفسة من كل حاجة عشان احنا بنات عشان يسيب لينا فلوس تنفعنا وقت الزنقة عرفت دلوقتى انه كان بيحبنا افتكرت كل الحاجات الحلوة اللى اتعميت ومش شفتها فى وقتها لا شفت الجانب الحلو بدات افسر كل حاجة بشكل تانى غير اللى ساعتها شوفته حتى القسوة كان داخلها حنان كان هدفها اننا نبقى جامدين نعرف قيمة القرش نعرف نقف فى وش الصعاب
سامحنى يا بابا يا غالى
سامحنى يا اللى فتحت عينك بعد مااتغسلت عشان تبصلى عشان تقولى انك بتحبنى بعد ما كنت ميت
بقالك 12 ساعة فى التلاجة وانا اللى كنت غبية مش فهمت
بس فين انت دلوقتى عشان تسامحنى دايما بشوفك فى احلامى بتحضنى اكيد دى رسالة بتقولى انك كنت بتحبنى
انا خلاص مش هقدر اعمل حاجة تانى غير انى ادعى لوالدى بس يا ريت كل واحدة منكم تراجع نفسها ترضى والديها قبل فوات الاوان وحطو فى بالكو انهم موجودين بس شويه وفجاة خلاص مش هتلاقوهم تانى
يا رب اكون هحيتلكوا عن حاجة مفيدة تكون عبرة للجميع
نفسى كل بنت فيكم تروح لابوها وامها وتبوس ايديها وكمان رجليها
نفسى كل ام واب ياخدوا اولادهم فى حضنهم ويقولولهم انهم بجد بيحبوهم
واتمنى ان كل اخت تدخل تقيملى الموضوع اذا شعرت انه مفيد او ممكن يفيد حد والسلام عليكم ورحمه وبركاته

ربنا يرحمه و يرحم والدى و اموات المسلمين اجمعين اوقات مخنا مش بيستوعب تفكير اهلنا و اوقات كتير بنفكر انهم بيعاملونا بقسوة لكن فى الاصل هما اكتر حنية عليا من اى حد بس تفكيرنا يبقى قاصر على اللى بنشوفه بعنينا و و مش بنفكر هما بيفكرو بايه و الموضوع اكثر من ممتاز و مستنين بالمزيد من الموضوعات الحلوة كدة

ربنا يرحمهم ويغفر له
و اموات المسلمين اجمعين

ياارب يرحمه ويغفر له ويجعل مثواها الجنه

كلامك مفيد جداااا لينتبة اى حد مقصى حب والديه

هم بجد اكتر ناس بتحبنا وبتتفانى لراحتنا ربنا يرحمهم دنيا واخره ويسكنهم جناته

بارك الله فيك للطرح الهادف غلاتى

اشكرك جميع العضوات الاتى اهتممن بالرد على وجزاكن الله خيرا اخواتى

اللهم اسكن موتانا الجنة اللهم انس وحدتهم وامن روعتهم

اللهم اغسلهم بالماء والثلج والبرد ونقهم من الذنوب والخطايا

» سامحنى يا الله
» اريد ان البس النقاب ويمنعنى والدى والرد للشيخ حسين يعقوب
» عيد ميلاد منتدانا الغالى كيداهم (الاول)
» كيف نستعد لستقبال الضيف الغالى شهر الخيرالحمد لله والصلاة وا
» كيف نستعد لستقبال الضيف الغالى شهر الخيرالحمد لله والصلاة وا