تعالوا ننظم نفسنا اكتر ونرتاااااااااااااااااااح

جندتى يا اجندتى
انا قررت اقولكم على سر خطير اخطر من سر شويبس ههههههههههه
شوفى بقى انا كل اللى يعرفنى يسمينى كشكول ههههههههه
عشان بحب امشي بالورقه والقلم واعمل مخطط لكل حاجه فى حياتى
اصلى كنت فى يوم من الايام مهندسه والهندسه ساعات بتنئح على هههههههههههه
بس بجد يا بنات رااااااااااااااحه ما بعدها راحه النتظيم والنظام لما يكون اسلوب حياتك ده احسن حاجه فى الدنيا
انات معرفش يعنى ايه هرجله ولا فوضى ولا يعنى ايه صاحيه من نومى الساعه 10
ولا 11 ولسه معرفتش هعمل ايه وعقبال ما افكر يبقى دخلنا عالساعه 1 ولا
اتنين كمان
طيب ليه انتوا عارفين المفروض يومنا يبدأ ازاى زى ما نبينا عليه الصلاه والسلام كلن بيبدأه يعنى من الفجر
ايوه الفجر
طبعا انا مش هقول نبدأ الفجر بس لما تصحى زى الهانم الساعه 10 يعنى بعد
الفجر ب6 ساعات ولسه مش عارفه هتعملى ايه 6 ساعات يعنى ربع يوم طار وانتى
لسه بتفكرى فى التلات اربع هتعملى فيهم ايه
طيب ما تخططى ليومك والموضوع مش هياخد منك ساعه زمن قبل ما تنامى تشوفى
عايزه تعملى ايه بكره وتكتبيه فى اجنده وتصحى وقت ما تظبطى وتنفذى واليوم
ميضيعش فى التفكير على الاقل
شوفى انا قررت اوريكى انا ماشيه ازاى
انا ماشيه حياتى بالورقه والقلم اه باخد وقت عقبال ما اخطط ليومى قبلها بيوم س اكيد مش زى ما هاخد وقت وانا بفكر فى نفس اليوم

انا هقولكم على اجندتى مقسماها ازاى
اول جزء :
بعمل قايمه باكل الشهر كله عشان محتارش فى الجمله الشهيره ( اعمل اكل ايه
بكره) وكمان بعمل قايمه كده صغيره للعزومات لو مامتك جايه تقعد عندك يومين
ولا حماتك زارتك ولا حد من قرايبك
والقايمه دى غير انها بتشيل هم الحيره اللى بنقع فيه كمان بتحددلنا
ميزانيه الشهر واحتياجاتنا وبرضه بتخلينا قبل ما ننزل السوق نكون عارفين
ايه اللى عايزينه وكميته ايه
طبعا ده بعمله كل اول شهر وساعات كمان بكون كاتبه الفطار والعشا وساعات من غير لان المهم الغدا هو الحيره كله

تانى جزء : مخطط لو فى حاجه هتتخزن الشهر ده بسجلها واعرف هخزن قد ايه والكيلو منها بكم وهتحاج فلوس قد ايه
وده برضه بيتحدد كل شهر على حسب الحاجه اللى هتتخزن لو فاكهه برتقال جوافه
مانجو فراوله مشمش او خضار الطماطم البسله الجزر اللمون السبانخ الباميه
القلقاس الملوخيه وهكذا
وده برضه بنحددله ميزانيه ونكون شايلين الفلوس ده على جنب
تالت جزء:
جزء الميزانيه بقسم مصروفى لبنود واعرف كل بند هيحتاج ايه وعلى جنب بكتب
لو فى حاجه عايزه اجيبها الشهر ده سواء للبيت او لبس لى او لبنتى او لجوزى
وكمان بفكر نفسي بالاجتماعيات يعنى قريبه لى هتولد ولا جاره هتجوز بنتها
ولا حد نجح ولا عيد ميلاد حد كده يعنى
مع طبعا بند التخزين والعزومات

رابع جزء :ده بقى جزء كده ثابت عندى زى مرجع للشقه
طبعا كل واحده فينا عارفه شقتها قد ايه وايه اللى بيتعمل فيها بالظبط
انا بقى كاتبه كل اوضه وتحتها بنود ببللى المفروض يتعمل فيها من الالف الى الياء وبالترتيب كمان
يعنى مثلا اوضه النوم تتزعف الملايات تتغير النجفه تتلمع الشباك يتغسل الحيطه تتصبن تحت السرير يتظبط فوق الدولاب يتظبط
جوه الدولاب يتظبط
التسريحه كمرايا تتلمع وتتظبط الحاجات اللى عليها
الدرف وادراج التسريحه تتظبط
اخشب كله يتلمع تتمسح الستاير تتغسل وواخيرا تتفرش
وكاتبه جنب كل بند المفروض يتعمل كل قد ايه
يعنى مثلا الملايات كل يومين بتتغير عندى
الستاير كل شهر وهكذا
الجزء ده هيفيدك اوى انك تبقى محدده كل سم فى شقتك هيحصل فى ايه وهيتعمل امتى
وانا هكتبلكم بالتفصيل الجزء ده وهحاول اعمله على برنامج اكسل واجيبهولكم عشان يبقى اسهل

خامس جزء : جداول ودى كلها ثابته

جدول يومى وده بنعمل ايه كل يوم فى البيت وده باخد من الجزء الخامس لانى بيبقى سهل على اطلع اى بيند مكتوب قدامه يومى واجمعه فى جدول
جدول نص اسبوعى زى مثلا تغيير الملايات كل اتنين وحميس مثلا او كل يومين
برضه عندى بصبن الحمام كل اتنين وخميس وبنزل السوق كل حد واربع
جدول اسبوعى مثلا كل خميس مسح الارض او مثلا تهويه الفرش او مثلا تلميع حيطان المطبخ او البوتاجاز
جدول شهرى زى الستاير تصبين الحيطان
وهكذا
وبرضه هكلمكم فى بالتفصيل

سادس جزء : مخطط اليوم يعنى
ابقى عارفه انى هعمل اكل ايه وكمان ايه اللى هعمله فى الشقه وده بجمعه من
الجزء الاول بتاع الاكل والجزء السادس بتاع الشقه وبكتب بقى لو ورايا انزل
السوق مثلا هعمل انا حاجه ماسك ولا حمام مغربي هحمى البنت هعمل صنف حلويات
كل حاجه بكتبها قبل ما انام
او ورايا مشوار
او حتى هروح مشوار فىيوم معين يبقى بظبط اللى كنت هعمله فى اليوم ده على باقى الايام وهكذا وده برضه هكلكم فى بالتفصيل
يعنى هتلا قى نفسك صاحيه من النوم وراكى 1 2 3 بالترتيب وكمان عارفه هياخدوا نمك وقت قد ايه

سابع جزء : لو مخطط بعيد شويه يعنى مثلا احنا داخلين على رمضان
انا من شهر بخططله هعمل ايه وهخزن ايه ليه وهجيب لبس العيد امتى وهظبط
شقتى امتى بحيث انى اعملها قبل رمضان او مثلا رايحه مصيف اظبط برضه حالى او
حتى رايحه اقعد كام يوم عند حماتى بكون مظبطه برضه شقتى وحالى قبل ما امشي
وهكذا

تامن جزء : التموين والحاجات اللى عندى بتخلص كل قد ايه
زى المسحوق الغسيل بكتب تمنه وبيخلص كل قد ايه
يعنى انا مثلا بجيب عبوه لانج 9 كيلو بتفعد 3 شهور فى الشتا وشهرين ونص فى الاصيف
بكتب جبتها امتى عشان ابقى عارفه هجيبها امتى تانى
الصابون السايل مثلا بعمله وبيقعد معايا شهرين او شهريت ونص برضه
الزيت بجيب عبوه زيت صنى الكبيره بتفه تلات شهور ببقى كاتبه جبتها امتى
وهتخلص امتى عشان اقسم ميزانيتى صح ملاقيش فى شهر محتاجه مثلا شيكاره رز
ب100ج مع مسحوق ب60ج مع زيت ب30ج كله مع بعضه لا بظبط حالى يعنى لو الدنيا
كركبت وهجيب حاجتين فى شهر واحد بعمل حسابي واجيب حاجه فى شهر وحاجه فى
الشهر اللى قبله وهكذا

انا كتبت بس الاجزاء وان شاء الله هكتبلكم بالتفصيل كل جزء
بس فعلا يا بنات لما نمشي بالورقه والقلم والله هتلاقوا اليوم ماشاء الله طويل والحياه هتبقى احلى
واللى حابه اكتبلها جداول تقولى وان تحت امرها

وعلى فكره يا بنات فى موضوع جميل اوى للعضوه الجميله ( عروس السماء)
بتتكلم فى انك ازاى تظبطى بيتك بالساعه زى الفليبينات
بجد موضوع جميل اوى وانا اخدت الفكره منه وحبيت انا كمان اعمل الموضوع ده
بجد اقروه فى منتهى الجمال وامانه تدعولها ان ربنا يجازيها كل خير ويبارك فى ابنها

سحر كتب:

تعالوا ننظم نفسنا اكتر ونرتاااااااااااااااااااح 2995766376

» تعالى نحب الصلاه اكتر
» ليه الناس بقيت ليها اكتر من وش
» معنى لا اله الا الله لو عرفتى معناها حتحبيه اكتر
» ازاى تقرب من ربنا اكتر وتخليه يحبك ؟
» لكل من ضاق به الحال...........تعالوا